الرئيسية » أقلام وآراء » كله علشانك يا غاليه
المشير عبد الفتاح السيسي
المشير عبد الفتاح السيسي

كله علشانك يا غاليه

بقلم / نهى مجدي

كله علشانك ياغاليه عمركم سمعتوا قبل كدا عن شحات الناس بتشحت منه ؟ فى خطاب المشير السيسى الاخير طلب فيه من المغتربين بالتبرع بشهر من رواتبهم علشان مصر . ياحبيبتى يامصر. على فكره ياجماعه علشان نبقى فاهمين والصوره واضحه , الناس المغتربه دى بتنقسم نصفين :- ناس عايشه كويس وناس كويس انها عايشه يعنى فعلا فيه ناس بتشتغل وتقبض رواتب عاليه ممكن منها تتبرع بجزء للمحتاج ومش هيأثر عليها فى حاجه , وناس تانيه بتشتغل وتقبض تاخد فلوس القبض تدفع منها أكل وسكن ومواصلات ويبعت ميه جنيه لأمه ويقولها بركاتك ياحجه وهيا تزغرط من الفرحه . طيب لما نتكلم عن النوع الاول اللى بيقبض فلوس كويسه ويقدر يتبرع , تفتكروا يتبرع لمين , لواحده جوزها مات ومعاها 3 عيال بتصرف عليهم ومعاشها 240 جنيه ,ولا يتبرع لولد يتيم نفسه يكمل تعليمه بس ممعهوش حق الكتب ولا المصاريف ولا يتبرع لمصر (ياحبيبتى يامصر) طيب لو واحد اخر الصف طلع وقال فيها ايه لما يتبرع لمصر ؟؟ هقولك مفيهاش حاجه ومن حق بلدنا وانتمائنا اننا لما نلاقى وطنا محتاج نمد له يد العون , بس لما القى مانشيت فى جريده الوطن والجرائد الاخرى بتقول ان اقرار الذمه الماليه الخاصه بالمشير السيسى تقدرنحو 30 مليون جنيه وجاى طمعان فى ال1000 جنيه بتاعتى ولا حتى لو بقبض عشر الاف وتقول هات من اللى معاك , هقولك هات انت !!!! ماهى مرارتى مش مستحمله كفايه اللى هيا شايفاه !!!

ياسياده المشير زى ماتتكلم عن المغترب اللى سايب اهله وامه وابوه وزوجته واولاده وحياته كلها حمار شغل يمكن حتى مش بيفضى يغسل وشه وتقوله تعالى هات مرتب شهر يمكن المرتب دا هوا اللى بيصرف بيه على امه وابوه واخواته واولاد الجيران كمان وسايب الوزراء والسفراء والرؤساء والهيئه المعاونه & تبرطع  فى مال ابونا , يبقى سيادتك بتهزر . والنوع التانى بقى اللى مش لاقى ياكل هل سيادتك فكرت فيه او فى اهله او حاولت توجد له فرصه عمل فى بلده حتى لو كانت بسيطه علشان تغنيه عن السفر والبهدله وقله القيمه واهو على راى المثل ( حمارتك العارجه تغنيك عن سؤال اللئيم ) . ولا مصر بتاخد بس . طيب ممكن اطلب من سيادتك انك تتبرع براتب شهرين ( انت الكبير ) علشان مصر؟ ما أخذ بالقوه فهوا حرام , شكرا يافندم على حرصك على نغنغه مصر .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *