الرئيسية » أقلام وآراء » ع القهاوى

ع القهاوى

بقلم / نهى مجدى

ع القهاوى ياقاعدين على القهاوى قوموا بقى وشدوا الحيل دا انتوا اللى باقى من حلم ناوى يسافر ويهجر بلاد النيل ياواد ياحلمى قوم يلا اجرى على اكل عيشك وعيش اخوك وانت يامحسن مش يبقى احسن لو كنت تزرع فى ارض ابوك وعم سيد ياسلام عليه , يفتح اديه الخير يجيبه لكنه ساب رزقه خلاص وقفل محله بتاع النحاس وقعدله بس على القهاوى عمال يجيب فى سيره الناس. وياعم صابر دا انا ياما صابر على المأسى وعلى المواجع وانت يادوب عديت دروب لقيتها صعبه فروحت راجع دا الرزق صعب ياعم صابر وعاوزك تكون على طول مبادر لحسن يعدى عمرك فى يوم وتلاقى اسمك على المقابر والا شديد ياعينى عليه خريج جديد من يو اس ايه ابوه دفعله ييجى دم قلبه علشان يخلص ويبقى بيه واهو اخونا خلص وجاى مملص من ايد ابوه جرى على القهاوى وفى قلبه ناوى ياخدله حته والدور عليه .

ابو لبيب بياع انابيب كان ييجى شايل الانبوبه ويلف بيها على البيوت دلوقتى قاعد للحبوبه يشربله شيشه وياكل فروت ياعم قوم واسعى لرزقك من الصبح امى عليك بتزعق قاللى يابيه دى الحاله نايمه والناس اهيه فى الهم عايمه طيب انت قوم وابدء بنفسك يمكن محطه الحلم تلحق و يمكن يشوفك عم سيد ويقوم ويفتح دكانه تانى ولا يشوفك الواد شديد ويسيب مكانه على القهاوى واهو ياما ناس قاعده وبس لاحد شافها ولابيها حس فيه ناس عايشين كما المساطيل بدون لزمه وناس شقيانه شايفه الويل تاكلها بضربه الجزمه ياشعب فوق , شم النشوء , واعطس وطلع عينك لفوق هتشوف ضباب ووراه سحاب ووراه آله عاطى وهاب قوله يارب دا الهم دب جوا الصدور وعلى القلوب دا الهم صعب والرزق صعب وعليه دا ياما دابت كعوب يارب احفظ قلوب شباب من الهم يئست عاش عمره كله يدرس وينجح ولاحاجه نفعت كان نفسه يبقى فى يوم وزير ولاسفير او يبقى مثلا دكتور كبير بس اللى شافه من ظلم باين خلاه يغرق حلمه فى بير انت اللى حاسس بينا يارب لاقلب ام ولا حضن اب وانت اللى قادر على الظلم وحدك قادر تبيده ولا حد قدك وانتوا ياشعب قوموا يلا بينا نسعى نخلى بلدنا احسن وهات اخوك ايده فى ايدينا دا العصبه تنجح وتبقى أمتن ياشعب فوق , شم النشوء , واعطس وطلع عينك لفوق .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *